Во Ликовен салон Велес отворена изложбата од авторот Мице Јанкуловски

На 04.02.2021 во 19 часот беше отворена Изложбата 50-години творештво МИЦКО во ЛУ Народен музеј ВЕЛЕС/Промоцијата на монографијата Мице Јанкуловски – Форма 3 и Промоцијата на видеото во Ликовен салон Велес 04.02.2021год.Изложбата ја отвори градоначалникот на Општина Велес, г-дин Аце Коцевски

Промотор: Спасе Перовски

Куратор: Корнелија Конеска

  Мице Јанкуловски е роден во Скопје во 1954 година , Македонија, дипломирал на Архитектонски факултет во Скопје.
Живее и работи во Скопје, С. Македонија

Уметничкиот опус на Јанкуловски припаѓа на различни области на уметноста, вклучува слики на платно, сатирични слики на стакло, цртежи, карикатури и анимации, палиндроми… Неговата биографија вклучува повеќе од педесет самостојни изложби кај нас и во светот, како и забележителни претставувања на меѓународни манифестации и биеналиња, како во Санкт Петерсбург, Солун, Торино, Фиренца, Венеција, Ларнака, Варна…

Како признание за неговата работа, тој е наградуван со престижни награди, меѓу кои се: Наградата „Ел ГРЕКО“ за најдобар уметник на АртТесалоники 2019, Грција; Наградата „Лоренцо Ил Мањифико“ за животно остварување на Фиренца Биенале 2019, Италија; Наградата „Уметник на светот“ на Ларнака Биенале 2018, Кипар; ГРАН ПРИ на 19-то Меѓународно графичко биенале Варна 2017, Бугарија; ГРАН ПРИ (во 1997) на Светската галерија на карикатури Скопје; Наградата „13 Ноември“ на Град Скопје во 1985 … и многу други.

Мице Јанкуловски е уметник со специфична појава, препознатлив пристап, фасцинантни истражувања и оригинални резултати. Неговата уметност зрачи со хармонија, убавина, мир и сочувство. Таа е резултат на долгогодишното креативно истражување на уметникот. Забележително воздржани, далечни и тивки, делата носат длабок филозофски поттекст, праќајќи визуелните пораки кон вечноста.

Слободата, виртуозноста, како и целосното спојување на идејата, концептот, и резултатот, обично ги карактеризираат сликите на Јанкуловски. Тој е уметник кој ја вреднува со исклучително значење естетиката на визуелната перфекција на делото. Со доследна продукција и постојано потврдување на неговата уметничка појава, тој го потврдува своето место во светот на современата уметност. Неговите дела, од кои дел имаме можност да ги видиме вечерва кај нас, го дефинираат и го промовираат како воспоставен уметник со суптилна чувствителност, со своја автономна креативна територија што ја воведува публиката во простори, светови и димензии исполнети со уникатна уметничка аура.

Освен уметнички, Јанкуловски има исклучително богат општесетвен живот преку кој активно придонесува за развојот на културата и уметноста во нашата земја и пошироко!

Тој е активен член на Друштвото на ликовните уметници на Македонија, на Здружението на карикатуристите на Македонија (како и негов актуелен претседател), на Федерацијата на карикатуристите (ФЕКО), како и на Светската асоцијација на визуелните уметности (САВУ), а исто така е основач на ОСТЕН Биеналето на цртеж и на ОСТЕН Музејот на цртеж во Скопје, С. Македонија.