Во Ликовен салон Велес, во четврток на 04 април 2019 година во 20 ч. се отвори изложба на слики на Лидија Саздовска, академски сликар од Скопје.
Лидија Саздовска е родена во Белград 1949 год. Дипломирала на Факултетот за Ликовни Уметности во Скопје, педагошки оддел – Сликарство во класата на проф. Ана Темкова. Има реализирано 13 самостојни изложби, а учествувала на голем број групни ликовни изложби и колонии и добитник е на повеќе награди.
Изложбата на слики на Лидија Саздовска е конципирана и поставена во пресрет на одбележувањето на четири децении ликовно творештво со пресек од севкупниот ликовен опус.
Преку циклусите насловени Меланхолија, Летно пладне, Медитации, Записи, Љубов и Ликови, се опфаќа еден специфичен дискурс од развојот на творештвото на авторката и преставува своевиден творечки рекапитулар по долгата творечка патека.
Сеопфатно, творештвото на Саздовска се следи и класифицира преку содржински слоеви на фигуративното сликарство, односно серии на слики со женски фигури и ликови кои наизменично се преплетуваат и се создаваат во зависност од периодот на творење, од нејзиното различно расположение, од емоционалниот порив и диктат на чувствата. Таа внимателно ја анализира, проучува и трансформира мотивската преокупација во нови претстави со засебни вредности, предавајќи прецизни и јасно детерминирани форми и облици на фигурални претстави кои се прочистени, заоблени, ритмички избалансирани во различни модификации. Така, во нејзините дела, присутната фигуративна опстановка е преточена во ликовни творби кои се есенцијални екстракти или записи на нејзината релација со надворешниот и внатрешниот свет, и генерално се одликуваат со студиозна, грижлива и педантна обработка, со усовршен индивидуален ликовен израз. Оттука, нејзиното сликарство е една ликовна приказна исткаена со сегменти од опкружувањето и животот воопшто.
Преку 37 слики во Ликовниот салон е поставенa целосната слика, богатa и сигурна во просторот, слика со моќен колорит, раскошна во оптичкото богатство.